Bestalde, Durangaldeko Itaia antolakundeak prest dauka Martxoaren 8rako mobilizazioa. Manifestazio bat eginda Durangoko kaleak zeharkatuko dituzte Emakume langileen askapenerako sozialismoa eraiki! lelopean.
Egitarau kulturala
La Dramática Errante antzerki taldeak Yerma antzezlana taularatuko du San Agustin kultur gunean, martxoaren 5ean. García Lorcaren obra gaur egungo sasoira egokituta aurkeztu du Ane Pikaza aktorea buru duen antzezlanak.
Bestalde, martxoaren 7an, Oneka pentsiodunen elkarteak Adineko emakumeok ez dugu amore ematen manifestua irakurriko du udaletxeko plazan.
Andraguneko tertulia literarioen partaideek txalaparta ikasleekin bat egingo dute Ana Malagonen testuak errezitatzeko. Andragunean elkartuko dira, martxoaren 18an, 18:30ean.
Abesti feministak
Abesti feministen IV. lehiaketako kontzertu finala San Agustin kultur gunean izango da entzungai, martxoaren 26an. Antolatzaileek jasotako lan musikalen artean epaimahaiak finalerako sailkatu dituenak izango dira oholtza gainean. Gazteei zuzenduriko ekimen honen helburu nagusia genero berdintasuna gai duen sorkuntza eta hausnarketa bultzatzea da, esparru eta ekimen ludiko baten bitartez. Bakarlarien jatorrizko abestirik onena, taldeko jatorrizko abestirik onena, jatorrizko abestia ez den bakarlari emanaldirik onena eta taldeko jatorrizko abestirik onena sarituko dituzte. Bideoak eta abesti edo bertsoen letrak m8lehiaketa@gmail.com helbidera bidali behar dira, martxoaren 13a baino lehenago.