Beste mendi talde askotan lez, Alpinon ere belaunaldien arteko erreleboa "falta" da; hau da, "ez dago gazterik" eta kezka hori akuilu lez erabili dute Alpinoko kidea den Sergio Aritzederraren esanetan.
Familientzat antolatzen dituzten irteeretan konturatu dira 12 urtetik gorako gazteek, normalean, ez dutela "gurasoekin ibili gura". Beraz, horixe da nerabeen gustuetara egokituriko ekintzen ezaugarri bat: lagun artean eta gurasorik barik egiteko modukoak dira. Baina hori bakarrik ez da nahikoa mendizaletasuna sustatzeko. "Mendirako irteerekin bakarrik ez dugu lortuko", uste du Aritzederrak. Horregaitik, ekintzei "adrenalina apur bat" gehitzen eta "erakargarriago" egiten ahalegindu dira: eskalada saioak, rapela, arroka-jaitsierak, mendiko orientazio saioak… eginez. Ekintzetan aditua den enpresa bat kontratatu dute eta eurekin eta Alpinoko kideekin ibiliko dira gazteak. "Kontua ez da gazteak enpresako lagunekin bidaltzea bakarrik. Ez, Alpinoko kideak ere hor egongo gara irteera guztietan", dio Aritzederrak. Batez ere, Alpinoko bazkideei bideraturiko ekintzak izango dira. Horrela, bazkideek "lehentasuna" izango dute taldeak osatzerakoan. Bazkideentzat "oso ekintza merkeak" izango dira eta, ildo horretatik, herritarrak Alpinoko bazkide egitera deitu dituzte. Bazkide egitea 40 euro da; eta lehenengo urtetik aurrera, 20 euro da urteroko kuota.
Gainera, ekintzak heziketarako erreminta lez ere baliatu gura dituzte, "balioak eta ohitura onak" sustatzeko.
Egitaraua
Sei irteera antolatu dituzte, bat hileko. Martxoaren 19 eta 20rako, Kantabriako Alto Campoo eski estaziora joango dira, neguko erraketekin ibiltzera eta teknika ikastera. Apirilaren 2an eta 3an Urkiolara joango dira, orientaziorako nozioak jasotzera —iparrorratza erabiltzera, mapak irakurtzera…— eta larrialdiko aterpe bat zelan egin ikastera, besteak beste.
Maiatzaren 15ean Eginoko (Araba) eskalada eskolan ibiliko dira; eskalatzen eta rapela egiten ikasiko dute. Teknika horiek ekainaren 5eko eta irailaren 11ko irteeretan ere ipini ahalko dituzte praktikan, arroilak jaisten ibiliko dira-eta Araban: Aguaquen eta Lezen, hurrenez hurren.
Azkenik, urriaren 9an Kantabria eta Burgos (Gaztela eta Leon) artean dagoen Lunada mendia igoko dute.