Durangoko Udalak Mugarra Triatloi Taldearen lana zoriondu eta eskertu nahi izan du, larunbat honetan Espainiako Triatloi Federazioaren (FETRI) Urrezko Bikaintasun mailako saria jaso aurretik.
Sari hori Mugarra T.T.-ri emango zaio, Madrilgo Batzorde Olinpiko Espainiarraren egoitzan egingo den ekitaldi batean. Ekitaldi horretan, FETRIk emango die saria, triatleta gazteen promozio eta prestakuntzaren alde egindako lan bikainaren ondorioz. Euskal Autonomia Erkidegoan, Mugarra Triatloi Taldea da aitorpen hori jasoko duen klub bakarra, Estatuko beste 20 klubekin batera.
Atzo udaletxean egindako harreran, Ima Garrastatxu alkateak eta Julian Rios alkateordeak eskerrak eman zizkien Mugarra Triatloi Taldeko ordezkariei udalerrian kirol eta gizarte arloan egiten duten lanagatik.
