Gisbertek berbaldian azalduko du edozein erakundek edo taldek sor dezakeela elkarri laguntzeko sare komunitario bat. Egonkortasun pertsonala eta auzotarren garapen emozionala hartuko ditu abiapuntutzat. Durangoko Udalak ohar batean adierazi duenez, "sare komunitario hori ezinbestekoa da familia-sareak gero eta txikiagoak diren eta gero eta bakardade-egoera gehiago sortzen ari diren gizarte batean". Julián Ríos alkateordeak gaineratu du sareok "gizatalde zaurgarrien inklusiorako tresna" ez ezik, "gazteen eta 55 urtetik gorakoen enplegurako eragile dinamiko" ere badirela.
Berbaldi hau Durangoko Aniztasun Eskolak antolatu du, Hizkuntza Boluntariotzaren Programaren esparruan. Immigrazioaren ezagutzan sakontzeko interesa duten eta udalerriko kulturen arteko bizikidetzarekin konprometituta dauden Durangoko pertsona guztiei zuzenduta dago.