Besteak beste, EITB "euskararen normalizaziorako tresna" bilakatzea, euskarazko streaming plataforma sortzea eta jada existitzen diren streaming bidezko plataformetan euskararen presentzia areagotzea eskatzen ditu manifestuak. "Hemen sinatzen dugunok, ikus-entzunezkoetan gure kulturaren eta hizkuntzaren defentsan aitzindari lana egiteko konpromisoa hartzen dugu, eta euskal jendarteari ere eskatzen diogu konpromisoa hartu dezan eta orain artean bezala bidelagun izan dadin", azaldu dute agerraldian.
Duela hilabete batzuk sortu zen Pantailak Euskaraz plataforma, eta hainbat kanpaina jarri ditu martxan; besteak beste, 30.000 herritar baino gehiagoren sinadura jaso dute.