Gregorio Vicario euskal preso durangarra ospitalera eraman dutela jakinarazi du Etxeratek

Euskal presoen eskubideen alde Durangon egindako mobilizazio bat, 2019an.

Burgosko espetxetik Leongo ospitalera eraman dute, Etxeraten berbetan, "bypass koronario" bat ipini eta ebakuntza egiteko. Durangoko Sarek preso durangarraren egoeragatiko "kezka eta ardura" adierazi du, eta, azaroaren 18an, Andra Mariko elizpean deitu duten elkarretaratzean parte hartzera deitu ditu durangarrak.

Etxeratek kritikatu duenez, "espetxean oso egoera txarrean egoteak, duen adinari gehituta, Durangoko presoaren osasuna apurka-apurka hondatzea dakar". Espetxe-administrazioari eskatu diote "berehalako irtenbide humanitarioak" har ditzan, Vicario "espetxetik ateratzeko edo espetxeratze arindua egiteko". Eskaera hori egin du Durangoko Sarek ere.

Etxeratek gaixotasun larriak dituzten gainerako 19 euskal presoei ezartzen zaizkien "neurri berak" eskatu ditu Vicariorentzat. Preso durangarrak 64 urte ditu eta Etxeraten arabera "22 urte" geratzen zaizkio espetxealdia betetzeko. 

Durangoko Sarek azaldu duenez, "preso durangarrak denbora luzea darama osasun arazoekin. 2020ko maiatzaz geroztik, bere gaitzarekin lotutako zenbait pasarte izan ditu. Azkena, igaro den azaroaren 3an. Kateterismo bat egin eta stent bat jarri zioten ospitalean, hedadura handiko iskemia larria diagnostikatu ondoren". Gaineratu dutenez, "eskuineko begiko erdiko zainean daukan oklusio bat dela eta, bertako ikusmena ia galduta du. Egoera itzulezina da". 

Durangoko Sarek elkarretaratzea deitu du azaroaren 18an, 19:30ean,, Andra Mariko elizpean. 

 

 

 

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.