Euren artean, Durango Kirol Taldea (DKT) dago, ekimena antolatzeko ardura duen atletismo kluba. Sailkapen orokorreko laugarren tokian sailkatu dira txapelketarako, eta podiuma zapaltzeko aukera dute. "Bigarren eta hirugarren postuetatik gertu gaude eta borrokan egotea espero dugu", adierazi zuen DKTko Orkatz Beitiak ekimenaren aurkezpenean.
Txapelketan goi mailako atletak ikusteko aukera egongo da. Esaterako, DKT taldeagaz arituko den Aurora Perez madrildarra. Espainiako txapelketan 11 domina irabazi ditu maila absolutuan, eta beste 46 master mailetan dabilenetik.
Beitiak atletismo pistara joateko deia egin zien durangarrei. "Batzuetan jendeak pentsatzen du adin batetik aurrera ezin dela maila handiko kirolean aritu, eta txapelketa ikustera doanak bertatik bertara ikusiko du hori ez dela horrela", esan zuen.