"Aurten Azokarik bada? Askok egin digute galdera. Bai noski, baDA! " hasi du hitzartzea Nerea Mujika Gerediaga elkarteko presidenteak. Durangoko Azokaren edizio berria aurrez aurrekoa eta online bidezkoa izatearen garrantzia nabarmendu ditu, baita ere. "Badakigu askorentzat une zailak direla eta datozen hilabeteak erantzunik gabeko galderaz beteak daudela. Eta hala ere, Azokan egoteko ahalegina egitea erabaki dute. Eskerrik asko Durangoko Azokan sinesteagatik", azaldu du Mujikak hunkiturik.
Urbeltz, "ilusioz"
Leire Urbeltzek irudia egiteko erronka "ilusio handiz, baina arduraz", hartu duela azpimarratu du, " Azokak duen garrantziagatik". 60.eko hamarkadako berrikuspena egin gura izan du irudian, eta Anbotoren magalean Kili eta Kuir pertsonaiak ageri dira, besteak beste.
Guneetarako izen ematea
Bestalde, Ahotsenea, Irudienea, Kabi@, Saguganbara eta Szenatokia guneak itzuliko direla nabarmendu du Mujikak. Horietan beraien lanak aurkeztu gura duten artistek urriaren 8tik aurrera eman ahalko dute izena.