"Egoera lehengoa baino hobea da; jendea bueltatzen hasi da eta pelikula asko ditugu zain"

Ekaitzaren ostean barealdia datorrela dio esaera zaharrak eta badirudi zinema aretoetara horrelako zer edo zer etorri daitekeela. Zugaza zinemako Emilio Ferreras arduradunak, behintzat, baikortasunez begiratu gura dio etorkizunari. "Ondo" ikusten du Eusko Jaurlaritzak merkataritzako eta kulturguneetako edukiera %60ra handitzeko harturiko erabakia, baina azpimarratu du edukiera horrek uda osoan egon behar zuela indarrean.

"Neurri berria ondo hartu dugu. Espero genuen. Baina oraindino ez dugu ulertzen zergaitik jaitsi  zen %35era kulturan", gaineratu du. Horrek herritarrengan "eragin psikologikoa" izan duela iritzi dio Ferrerasek. "Jendeak beldur moduko bat izan du. Zinemako edukiera %35ekoa bada, zerbaitegaitik izango dela pentsatuko zuten. Beldur hori igarri dugu", azaldu du Ferrerasek.

Abuztuko azken aste bietan zinema aretoa zarratzea erabaki zuen Ferrerasek, baina ateak berriro ere zabaltzea erabaki du orain. Alderik alde, eta gogotsu. Egunotan mugimendua igartzen dabilelako sektorean: "Egoera lehengoa baino dezente hobea da. Jendea bueltatzen hasi da. Estreinaldietako saila gure txarteldegia betetzen ari da. Pelikula asko dugu. Astean bospasei pelikula ematera helduko garela esango nuke. Eta, jakina, edukiera handitzeak ere badu eragina film banatzaileen erabakietan", dio. Orain, Durangoko eta eskualdeko herritarrak bertaratzea baino ez da falta. "Udazkenari begira rock musikari buruzko dokumental sorta bat eskaini gura dugu, udalagaz elkarlanean. Kultura sailagaz ere bagaude hartu-emanetan. Euskarazko pelikula sorta bat eskainiko dugu goizetan. Marvelen estreinaldi bat dugu zain. Almodovarrena ere bai. Hau guztia beste itxura bat hartzen hasi da", dio Ferrerasek.

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.