Momentuz ez da behin-betiko erabakia, baina Durangoko gobernu taldeak horixe aurreikusi du: datorren urteari begirako tasak, zergak eta prezio publikoak dauden bezala uztea. Hau da, Ondasun Higiezinen gaineko Zerga, Hondakinen gaineko Zerga, Automobilena eta TAOarena dauden kopuruan mantentzea aurreikusi du. Udal gobernu taldeko kideek diote "durangar askoren egoera zaila" ulertuta, zergak izoztea eta "oreka ekonomikoa" bilatzea gura dutela.
Hobarien atala berrikusi dutela, eta horiek indarrean dauden araudira egokitu dituztela ere gaineratu dute. Gai hau datorren osoko bilkuran eztabaidatuko dute zinegotziek, uztailaren 21ean. Baliteke behin betiko erabakia bilkura horretan hartzea.
Negoziazioa oposizioagaz
Udal gobernu taldeko kideek jakinarazi dutenez, EAJk eta PSE-EEk 19 zuzenketa aurkeztu dituzte, eta "neurri horietako batzuk" honezkero Ordenantza Fiskalen zirriborroan txertatu dituzte. "Ikusten dugu oposizioaren proposamen batzuk gure planteamenduan sar daitezkeela, eta, beraz, integratu egin ditugu. Zentzu horretan, Osokoaren azken egunera arte oposizioarekin negoziatzeko prest jarraitzen dugu, Ordenantza Fiskalak ahalik eta osoenak adosteko".