Durangoko Udalak aurreratu duenez, sistema berriak bi berrikuntza nagusi izango ditu. Batetik, matrikula irakurgailua ipiniko du Alde Zaharreko ibilgailuen sartu-irtenetarako. Bestetik, Barandiaran eta Sanagustinalde kaleak oinezkoentzako gune izendatuko ditu asteburuetan eta jaiegunetan. Neurriok irailetik aurrera ipiniko dira martxan, eta hori guztia azaltzeko bilerara deitu dituzte Alde Zaharreko, Barandiaran kaleko eta Sanagustinalde kaleetako bizilagunak. Bilkura eguazten honetan izango da, hilak 7, 18:30etan, San Agustin kulturgunean. "Ezer baino lehen, egingo diren aldaketen berri eman nahi diegu bizilagunei, sor daitezkeen zalantzei zuzenean erantzun ahal izateko. Haiekin komunikazio zuzena mantendu nahi dugu, sistema berrirako trantsizioa hobea izan dadin" azaldu dute Aritz Bravo eta Jorge Varela zinegotziek.
Udalaren arabera, matrikulak irakurtzeko sistema berriak "urtean 50.000 euro inguru gastatzea saihestuko du". Bestalde, Sanagustinalde eta Barandiaran kaleak asteburuetan zein jaiegunetan libratzeak oinezkoentzako "25.000 metro koadro berreskuratzea" ekarriko duela gaineratu du.