Egitarau alternatibo horrek Kultur Aro programa izango du oinarri modura, baina udal agintariek azaldu dute, ekarpenak gaineratuko dituztela bertan. "Kontzertuak, kale antzerkia, dantzak eta auzoetan jarduerak egotea gura dugu. Baina, horretarako, irailaren hasierara arte itxarongo dugu uda nola garatu den ikusteko eta egoera epidemiologikoa aztertzeko", azaldu dute Juanan Bueno eta Mikel Uriguena zinegotziek.
Udalak pandemia baino lehenagoko ekitaldiak berreskuratu gura ditu, eta horretarako elkarte guztiekin batzen hasiko da datozen asteetan. "Guztiok dugu normaltasuna berreskuratzeko gogoa, baina ez dugu ahaztu behar sufritu dugun guztia eta honaino ekarri gaituena", esan dute zinegotziek. "Ilusiotik" eta,"erantzukizun kolektibotik" lan egiten jarraituko dutela esan dute.