Erabakiren arabera "historikoa" izan zen domekakoa. Plataformak markatutako "aurreikuspen guztiak gainditu" ziren. "Ez da sekula egon durangarroi dagokigun gai bati buruzko galdeketarik, prozesu parte-hartzaile edo iritzi-emate ariketarik, halako parte hartzea izan duenik. Martxoaren 14koa herritarron ahalduntze ariketa izugarria izan zen, gure herriari dagokion gai bati buruz erabakia hartzekoa. Erabakietan parte hartzeko modu berri baten hasiera izan daiteke hau, jendea erabakitzeko gogoz dagoela ikusi genuen", baloratu du plataformak, hedabideetara bidalitako oharrean.
Emaitzari buruz ere berba egin du berba. Honakoa dio galdeketan parte hartu zutenen %94 inguruk indarrean dagoen proiektua gelditzea eskatu dutela-eta: "Orain, instituzioei dagokie Durangok domekan esan zuena esan eta PERI1 ferrocarril proiektua bertan behera utzi eta prozesu parte-hartzaile bat izango duen alternatiba bideragarri baten azterketa martxan ipintzea".
Bide baten amaiera
Erabakik amaitutzat eman du bere ibilbidea, baina aurrera begira, parte hartzea normalizatzeko hitzordu gehiago egoten daitezen eskatu du. Ez hori bakarrik. Domekan Europako nazionalitatea ez edukitzeagatik hainbat herritar parte hartu barik gelditu zirela- eta, aurrerantzean, horiei aukera ere ematea eskatu du plataformak. Erabakik eskerrak eman dizkie durangarrei: "Eskerrik asko, Durango. Erabaki dugu eta erabakitzen jarraituko dugu!"