Asteburu honetan Aukera Azokaren 16. aldia antolatuko du Dendak Bai elkarteak Eusko Jaurlaritzaren eta Durangoko Udalaren babesarekin. Aurten Durangoko 18 saltoki batuko dira Landako Gunean. Denboraldi honetan edo beste batzuetan saldu barik geratu diren produktuak prezio merkeagoan salduko dituzte.
Mota guztietako saltokiak egongo dira: ume zein nagusientzako arropak, kirol arlokoak, oinetakoak… Produktu horiek guztiak 15 saltokitan banatuko dira; beste hirurak postu gastronomikoak izango dira.
Sarrera doakoa izango da eta, erosketaren bat egiten duenak, orduta bitan dohainik izango du Landako Gunearen azpiko aparkalekua.
"Ez da urte erraza izaten ari ehungintzaren sektorean", adierazi du Dendak Bai elkarteko Alex Palaciosek. Horregatik, herritarrak azokan "parte hartzera" eta komertzio horiei "laguntzera" animatu ditu.
Segurtasun neurriak
Hainbat neurri hartu dituzte segurtasuna bermatzeko. Esaterako, edukiera mugatuta egongo da, bai azokan bertan eta bai postu bakoitzean. Azokako edukiera Dendak Bai elkartekoek kontrolatuko dute, horretarako jarritako makina baten bidez; postu bakoitzeko edukiera postuetako arduradunek zainduko dute. "Gainera, normalean baino jende gehiago egongo da sarrera-irteeretan, pasilloetan… segurtasun neurriak zaindu daitezen gogoratzeko. Eta bozgorailuetatik ere informazioa emango da", adierazi du Palaciosek.
Horrez gainera, Barruan noranzkoa bakarrean bakarrik ibili ahalko da, eta sarrera-irteerak ate desberdinetan egongo dira.
AUKERA AZOKAKO ORDUTEGIA
BARIKUAN ETA ZAPATUAN
10:00-14:00 / 17:00-21:00
DOMEKAN
11:00-14:00 / 17:00-19:00