Durangoko Podemos-Ahal Duguk "sorpresaz" hartu du Durangoko Goienkalen duten egoitzan egindako pintada, Pablo Hasel kantari katalana aske uztea eskatuz. "Ez dugu ulertzen zein den helarazi gura izan diguten mezua. Izan ere, bat gatoz pintadak aldarrikatutako mezuagaz", argitu du Sabina Mendez Durangoko Podemoseko ordezkariak. Nabarmendu du alderdiak abeslaria indultatzeko eskari bat erregistratu duela.
Mendezek nabarmendu duenez, "ez zen inoiz gertatu behar. Orain gutxiago, azken egunotan Madrilen izan diren gertakariak ikusita, tartean Dibisio Urdinari egindako omenaldia".
Kartzelan dago Pablo Hasel abeslari katalana. "Terrorismoari gorazarre" eta "Koroari eta Estatuko erakundeei irain" egin izana egotzita.