Euskal Telebistako Zuhaitz Gurrutxaga, Mikel Pagadizabal eta Sara Gandara aurkezleek Durangotik eskainiko dute urte amaierako kanpaien saioa, zuzenean. Andra Mariaren elizatik gertu kokatuko dute zuzeneko emankizunerako set-a, etxebizitza-sabai baten gainaldean. Aurkezleek, Andra Mariaren elizako erlojua izango dute atzean, eta haren orratzek markatuko dute urte zaharrari agur esan eta berriari ongietorria emateko tartea.
Durangarrak 'Herritxiki' saioan
Zuzeneko konexioa baino lehen, Herri txiki, infernu handi saioaren atal berezia eskainiko du Euskal Telebistak. Bertan, Zuhaitz Gurrutxagaren eta Mikel Pagadizabalen ohiko aldrebeskeriak agertuko dira. Bi aurkezleak Durangoko kaleetan ibiliko dira herritarrak ezagutzen.