Iurdan Martitegi presoa isolamendutik ateratzea eskatu dute mosaiko bategaz

Iurdan Martitegi durangarra isolamendu egoeran dagoen euskal preso bakarra dela salatu du gaur Sarek. Egoera honekin amaitzeko eskatu dute giza kate eta mosaiko batekin. 

Dozenaka lagunek giza katea egin dute Ezkurditik udaletxera. Martitegiri Soto del Real (Madrid, Espainia) gutunak bidaltzeko aukera egon da, baita ere. 

Martitegi uztailean espainiaratu zuten, Frantziatik, eta lehenengo unetik isolatuta eduki dute espetxean. Martitegiren moduloan ez dago beste presorik. Gainera, isolamenduaren ondorioz patio orduak eta komunikazioa murriztuta ditu eta ezin du kartzelako ekintzetan parte hartu, besteak beste. 

Vicario Burgosera 

Espainiako Espetxe Erakundeek jakinarazi dutenez, beste bost euskal preso hurbilduko dituzte datozen egunetan, tartean Gregorio Vicario Setien preso durangarra. Vicario Burgosko (Espainia) espetxera lekualdatuko dute, Durangotik 215 kilometrora. Egun Topasen (Salamanca, Espainia) dago preso durangarra. 

 

 

 

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.