“Pintxo on batean, denak lotura bat izatea oinarrizkoa dela uste dut”

Aitziber Basauri 2020ko aza. 8a, 12:30

Kobika jatetxeak Bizkaiko pintxorik onenaren saria lortu du 'Green Bilbao' pintxoagaz, eta Euskadiko pintxo tradizionalik onenaren saria 'Txamaka' pintxoagaz. Kortabitarte anaiek taldekako Iron Chef saria ere ekarri dute etxera: Bizkaiak 'Cerdo esférico' proposamenagaz irabazi du Gipuzkoaren, Arabaren, Nafarroaren eta Bizkaiaren arteko lehia.

Pozik lortutako sariekin? Zer suposatzen du zuentzat onarpen honek?
Oso pozik gaude. Zaila izaten da, jendea oso prestatuta doa eta, zer esanik ez gazteak. Gu erretiratzeko gogoz daude, baina oraindino lana emateko moduan gaude (barrez). Konfort zonatik kanpora mantentzeko balio digute sariek. Beti prest egoten jarraitzeko modua da eta sortzen denari adi egotera behartzen gaitu. Lehiatzea gustatzen zaigu eta, denbora kendu arren, beti zerbait prestatzen egotera behartzen gaitu, erlaxatu barik. Aberasgarria da eta jatetxea bizirik mantentzen du.

Esperientzia handia duzue lehiaketetan. Noiz hasi zineten halakoetan parte hartzen?
2006an. Badira urte batzuk. Bizkaiko txapelketa laugarrenez irabazi dugu, eta 2. saria ere lortu dugu inoiz. Euskadin ere hainbat sari eta aipamen jaso dugu, sari potoloa heldu ez den arren. Aurten, Euskadikoan, pintxo tradizionaletan irabazi dugu.

'Green Bilbao' eta 'Txamaka' dira pintxo sarituak. Zer dute berezia?
Oso errazak dira, xumeak. Green Bilbao, adibidez, bisualki ez da gauza handia, ez dago larregi apainduta. Baina teknika eta prestaketa lan handia du. Kalkulu milimetrikoa esango nuke. Gauza apartekoa ematen ez duen arren, dastatzerakoan zaporeak harritu egiten zaitu, bete. Itxura erraz batean gauza asko batzea topatu behar dela uste dut.

Zerk inspiratu zaituzte? Ez da erronka erraza urtero pintxo bat sortzea.
Ideia da garrantzitsuena. Ondoren, ideia hori landu behar da. Green Bilbao pintxoa iaz sortu genuen. Hala ere, ez geunden guztiz konforme eta pintxoa hobetzen eman dugu urtea. Pintxo hotza gura genuen, inoiz egin ez duguna, eta inguruagaz identifikagarria. Bada, Durangon dugun baldosaren itxura eman diogu, Bilbokoaren berdina dena. Formatu gozoa da ezaguna, baina guk gatzduna egin dugu.

Zer behar du pintxo on batek?
Zentzu bat izatea. Denak lotura bat izatea oinarrizkoa da: platererako errezeta bat edo bi hartu eta horiek txikira eraman behar dira. Bizpahiru mokadutan dena barrura joan behar da, eta kolpean sartuko diren arren identifikagarriak diren hainbat ñabardura batu behar ditu. Pintxo bat diseinatzea ematen duen baino zailagoa da.

Zein da zure pintxorik gogokoena?
Patata tortilla eta urdaiazpiko pintxo zalea naiz. Dena dela, desberdina da pintxoa gosea kentzeko jatea, edo dastatzeko jatea. Kontzeptu desberdinak dira, biak balekoak. Diseinuzko pintxo hauek dastatzeko dira, lasai jateko. Zelan egin diren ulertzeko, gosea kentzeko baino gehiago.

Pintxo jana ala platerean jatekoa?
Gurago dut askotatik gutxi jan, gutxitik asko baino. Askoz gehiago probatu eta ikusiko dugu, eta gehiago dibertituko gara. Mokaduak jatea da nire gomendioa, eta okela edo arrain on bategaz amaitzea.

Eguen, bariku eta zapatuetan, saritutako pintxoak eskaintzen dituzue. Orain, egoera berrira egokituta.
Hala da, eta oso harrera ona du. Afaltzeko era desberdin eta dibertigarria da. Etsipenez, baina egokitu egin behar. Bezeroari segurtasuna ematea da garrantzitsuena, eta hartzen ditugu neurriak horretarako. Ezinbestean, asko dugu galtzeko eta. Ziurgabetasuna handia da.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!