Ganso bakarrik igoko da taula gainera, lehenengoz, 'Alpha' antzezlanean

Aritz Maldonado 2020ko urr. 30a, 10:30

Ganso&cia konpainiak proposamen egokia dakar bizi dugun sasoirako. Asteburuan, Alpha klown ikuskizuna estreinatuko dute, Durangoko San Agustin kulturgunean. Beldurra da obraren ardatza, eta barrea proposatzen dute "birus horri aurre egiteko". Oraingoan, Gorka Ganso bera bakarrik igoko da taula gainera, Iñaki Santos musikariagaz batera.

Lehenengoz, Gansok bideo proiekzioak ere erabiliko ditu antzezlan batean. Familia osoarentzako ikuskizuna da. Gansok Alpharen hiru emanaldi eskaniko ditu, lehenengoa gaur; zapatuan eta domekan ere egongo da ikusgai. Emanaldi guztiak 18:00etan izango dira. Sarrerak San Agustinen bertan, Arte eta Historia museoan edota Kutxabanken bitartez erosi daitezke.

Kultura, segurua
Osasun egoerak baldintzaturiko sasoian, San Agustin kulturgunetik kultur ikuskizunetara joateko deia egin dute egunotan, eta kultura segurua dela gogoratu dute beste behin ere.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!