Yogurinha Borovak eta Cecilia Paganinik boluda bingo bereziak egingo dituzte Plateruenean

Aritz Maldonado 2020ko uzt. 14a, 12:49

Plateruena boluda gauz mozorrotuko da aste honetan, berriro ere. Baina oraingoan bingoan jokatzeko. Honako hau ez da ohiko bingoa izango. Musika eta antzerkia batuko dituen bingoa eskainiko dute lau gauetan. Bingo saioak eguenetan izango dira, eta urtean zehar egiten den boluda saioetan lez, barrea eragitea izango da ekitaldiaren helburua. Cecilia Paganini arduratuko da bingoko zenbakiak esateaz, baina artista argentinarra ez da bakarrik arituko.

Paganinik Yogurinha Borova artistaren laguntza edukiko du. Eurekin batera Ibai Sanchez musika-jartzailea ere arituko da. "Yogurinha bingo saioetako anfitrioia izango da. Kantak abestuko ditu eta performanceak ere egingo ditu disko-jartzaileagaz batera. Ni umore ukitu bat ematen ahaleginduko naiz, inprobisatzen", azaldu du Cecilia Paganinik. "Ohiko bingo jolasa izango da, baina saio bakoitza bakarra izango da, abestien eta publikoaren arabera inprobisatuko dugulako. Oso ondo pasatuko dugu", gaineratu du.

Bertaratzen den bakoitzak kartoi bi jasoko ditu jokatu ahal izateko. Saioak 21:00etan izango dira eta Plateruenako terrazan izango dira (eguraldi txarra eginez gero, barruan egingo dira). Bertaratzen direnek opari bereziak jasoko dituzte.

Uda bete ekitaldi
Uztailagaz batera hasi zen Uda Kulturaz Blai! jaialdia Durangon. Los Cazahuates eta Africa taldeen kontzertuekin eta Haatik eta L´Atelier konpainien dantza emanaldiagaz hasi zen jaialdia. Segurtasun neurri bereziekin eman zaio hasiera uda kulturalari. Uztailean eta abuztuan zehar ekitaldi gehiago egongo dira.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!