[BIDEOA] Irati Bilbao eta Mikel Nuñez musikariek Martxoak 31 abestia kantatu dute, bonbardaketaren urteurrena gogoratzeko

Bihar 83 urte beteko dira Durango bonbardatu zutenetik, eta koronabirusa ez da oztopo egun hori gogoratzeko. Gerediaga Elkarteak, esaterako, hiru bideo sareratu ditu urteurrenaren harira. Euretako batean, Irati Bilbao Gandarias musikariak 'Martxoak 31' izeneko abestia kantatzen du Mikel Nuñez Lauzirika pianojolearen laguntzarekin. Xabier Amurizak eta Ander Erzillak bonbardaketaren harira sortutako abestia da.

Gerediagaren youtube kanaleko bigarren bideoa kaleko erakusketa egiteko erabili behar zituzten argazki zaharrekin osatu dute. Hirugarren bideoan 2016an Gerediaga Elkarteak ekoiztu zuen bonbardaketako aztarnei buruzko ikus-entzunezkoa ikusi daiteke. 

Bideo horiez gainera, Durangoko Udalarekin bat, biharko egunerako Unai Iturriagak idatzitako adierazpen instituzionalean parte hartuko du Gerediaga Elkarteak, ohar batean jakinarazi duenez. Horrez gainera, bihar, www.durango.eus udalaren webgunean sareko ekimenak jasoz atal berezia bistaratuko da.

Herri ekimenak

Badira bestetik, herritarrengandik sortutako beste ekimen batzuk leiho eta balkoietarako. Alde batetik Ikurriña edo zapi bat krespoi beltzarekin jartzeko deia egin dute sare sozialetan. Beste deialdi batek bihar, 21:00etan, Durango sirena hotsez betetzea proposatzen du.

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.