Euskal Herrian ginebrak badu merkaturik?
Bai! Garagardoak egin duen ibilbide berdina egin dezake. Lehen, gutxi batzuek egiten zuten garagardoa Euskal Herrian. Orain, geroago eta gehiago daude.
Euskal DNA duen ginebra bakarra da Astobizarena?
Txakolinetik eratorritako ginebra bakarra da, hori bai.
Zerk eroan zintuzten ginebra egitera?
Originala izan zitekeela pentsatu genuen; txakolinetik sortutako ginebrarik ez dugu ezagutzen. Eta, adibidez, txakolina ekoizteko prozesuan dauden inausteak aprobetxatzeko aukera ematen du. Osagai berdinekin produktibitate handiagoa lortu daiteke.
Londresko World Gin Awards lehiaketan sarituak izan zarete.
Espainiar Estatuko London Dry Gin onenaren saria jaso dugu. Poztekoa da, produktuari emandako izenagatik, batez ere: txakolina lako Euskal Herriko produktu batetik beste bat lortu izana, mundu zabalean erakusteko modukoa, esanguratsua da Astobizarentzat. Ateak zabaltzen ditu beste herrialde batzuetan sartzeko. Irudirik onenaren saria ere lortu genuen.
Euskal Herriko osagaiak %100ean erabili dituzue?
Laredoko (Kantabria) limoiren bat kenduta, osagai guztiak Euskal Herrikoak dira. Botanikoak (mahatsa, masustak, basaranak, loreak...) Aiala bailarako mahatsondoetatik hartzen ditugu, eta ipuruak-eta Euskal Herriko beste leku batzuetatik, pomeloak eta marrubiak, adibidez. Gure ipuruek, txakolinak eta mahats esentziak egiten dute berezia ginebra hau. Txakolina egiteko mahatsa fermentatzean askatutako karbonikoa destilatzen dugu, -60 gradutan. Ondoren, guk esandako proportzioetan, Basque Moonshineres destilategiak gure errezetekin destilatzen du.
Marrubiak, loreak eta masustak aipatu dituzu...
Mugarik bako prozesua da ginebrarena, eman gura diozun zapore edo usainaren arabera aukeratzen dira osagai asko. Marrubiak sartzea azken momentuko proba izan zen eta ez du ematen txarto joan denik.
Zer hartu behar da kontuan ginebra on bat hartzerakoan?
Gardentasuna, batez ere. Edaterako orduan freskotasuna, zitrikoen ukitua, eta, edan ostean, ahoan zaporea mantentzea. Hori bilatzen dugu guk behintzat. Dena dela, ginebra mota asko daude, badaude urdinerako joera dutena, gardenak izan beharrean.
Gin-tonicaren aroan gaude? Badakigu zelan hartu ginebra?
Ez dakit horrenbesterako den, baina bazkaloste eta afalosteetan geroago eta gehiago ikusten den edaria da. Gustu kontua da, baina konbinatzen jakin behar dela uste dut. Edariari behar ez dituenak botatzen zaizkio askotan. Pepinoa, adibidez, oso aromatikoa da eta ginebraren zaporea hil egiten du.