Ohar batekin erantzun dio EAJk EH Bilduk goizean igorritako mezuari. Hain zuzen ere, "dispertsioaren aurkako" kartel bat kentzea eskatzea leporatu dio bertan EH Bilduk EAJri. Jeltzaleek, ostera, eskariaren helburua "indarrean dagoen araudia betearaztea" dela erantzun dute. "Durangok atsegina izaten jarraitzea gura dugu, bai bertan bizi garenontzat, bai kanpotik bisitan datozenentzat".
EAJk HAZn eginiko eskaera orriaren kopia ere bidali du oharragaz batera. Bertan, 40 Minutu Rock jaialdiaren baitan "Durangoko Udalaren berariazko baimenik barik Landako Gunean jarritako kartel eta pankartak" jarri zirela adierazten du Mireia Elkoroiribek. Hori dela eta, legedia betetzeko eskatzen du HAZn eginiko eskarian, eta horretatako "baimenik gabeko kartel eta pankartak kentzea edota arau apurketa larri honi dagozkion zigorrak ezartzea" eskatuz.
Oharra amaitzeko, oposizio lana "erantzukizunez eta seriotasunez" egiten jarraituko duela iragarri du alderdi jeltzaleak.
