Euskal gatazka abiapuntu hartuta, 'Harri orri ar' antzezlanak elkarbizitzari buruzko gogoeta dakar

Aritz Maldonado 2020ko ots. 28a, 10:22

Harri orri ar antzezlanak 2010eko irailaren 5a du abiapuntu. Maria Goirizelaia antzezlanaren sortzaile eta zuzendariak ETAk su-etena iragarri osteko elkarbizitza aro berriari buruz idatzi du. Istorioak pentsaera politiko desberdina duten zazpi lagun aurrez aurre ipiniko ditu, Bilboko jolastoki batean; haurtzaroko jolasen bitartez, pertsonaiak aurrez aurre ipiniko dira, eta baita bakoitzaren ideiak ere. Horrela, Goirizelaiak gogoetarako gune bat zabaldu gura dio ikusleari patioan. "Ideologia desberdineko pertsonak elkarbizitzan batzen dituen espazioa da patioa, enpatia-ariketa bat", adierazi du Goirizelaiak. "Besteari begietara begiratuta, zauriak sendatu gura dituen antzerki ikuskizun bat da", gaineratu du.

Esandako moduan, zazpi lagunek hezurmamitzen dituzte protagonistak; Iñake Irastorza, Nagor Gonzalez, Martxelo Rubio, Josune Velez de Mendizabal, Haizea Baiges, Jontxu Martinez eta Egoitz Sanchez dira aktore lanak egingo dituztenak.

Antzerkigintza berriak
El patio de mi casa 'Antzerkigintza berriak' ekimenaren barruan hautaturiko proiektua da. Bilboko Arriaga, Donostiako Victoria Eugenia eta Gasteizko Principal antzokiek elkarregaz ekoitzi dute lana. Obra euskaraz eta gaztelaniaz eskainiko dute. Durangokoa gaztelaniaz izango da. Bilbon eta Donostian antzeztu eta gero heldu da Durangora. Gero, Basurin, Ermuan, Zornotzan, Santurtzin eta Ordizian egingo dituzte emanaldiak.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!