Eskola-garraioko haurren segurtasunari buruzko jardunaldiak antolatu ditu Stop Istripuak Euskadik

Joseba Derteano 2020ko ots. 5a, 15:19

Eguen honetan, 18:00etan izango dira, Durangoko Turismo Bulegoan.

Guraso-talde batek egindako eskaeran du sorburua jardunaldiak. “Guraso horiek kezkatuta daude beren seme-alabek egunero ikastetxera garraio mota horretan doazelako edo, besterik gabe, haurrekin beste edozein herritara autobusez doazenelako, azaldu dute Stop Istripuak Euskaditik, ohar batean.

Jardunaldian, gai horretan aditua den batek emango ditu azalpenak. “Gaur egun zer dagoen eta, epe laburrean zein luzean, ildo horretan zer egiten ari den azalduko du”.

Horrez gain, autobus-konpainia bateko ordezkari batek parte hartuko du, egunero eskola-ibilbidea egiten duena. Ikastetxe bateko ordezkari bat ere gonbidatu dute. Ikastetxe horretara egunero 1.800 ikasle inguru joaten dira autobusez. Azkenik, Durangoko eskola bateko guraso elkarteko ordezkari bat ere egongo da.

Honako hauek izango dira hizlariak:

- Mikel Garrido (Umeen Segurtasunerako Elkartea)
- Idoia Cuadra ('Cuadrabus' autobus konpainiako arduraduna)
- Juan Manuel Afonso ('Colegio Vizcaya'-ko umeen garraiorako arduraduna)
- Natalia Guerra (Zabalarra eskolako gurasoen elkarteko ordezkaria)

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!