Urtarrilaren 31n hilabetea bukatzearekin batera, produktu eta ekoizpen jasangarriak elkartzen dituen Berdeago azoka antolatuko dute Durangoko Landako Gunean. Asteburu bakoitzean bi ildo desberdin jorratuko dituzte: Urtarrilaren 31tik otsailaren 2ra bitarte "Berdeago Energy" deituriko asteburua antolatuko dute; eta otsailaren 8 eta 9an, berriz, "Berdeago Nature".
Gaur egindako prentsaurrekoan, Durangoko alkate Ima Garrastatxuk esan du "pozgarria" dela Durangok "Berdeago bezalako azoka garrantzitsua hartzea". Alde horretatik, Garrastatxuk gaineratu du Durangoko Udalak bat egiten duela "azokak bultzatzen duen filosofiarekin", eta herri garbiago eta jasangarriagoa eraikitzeko lan egingo dutela adierazi du.