Ezberdina izateari beldurrik ez izateko aldarria duen 'Kaskarot' antzezlana dakar ATXek Durangora

Aritz Maldonado 2020ko urt. 18a, 10:00

Gizarte distopiko batean kokatzen da ATX teatroaren 'Kaskarot'. Dantzatzea debekatuta dagoen gizarte batean bizi da Aner. Honi, baina, izugarri gustatzen zaio dantzan egitea, eta horrek arazo larriak sortzen dizkio. Kaskarot alter egoa sortuko du eta honek egoerari buelta ematen lagunduko dio. Domekan izango da emanaldia, 18:00etan. Sarrerak 4 euroan erosi ahalko dira.

Arantza Arrazola San Agustin kulturguneko teknikariaren esanetan, familia ikuskizun hau "ez da ohikoa". Gartxot Unsainek (berak idatzi du obra) agure narratzailearen papera du eta istorioak aurkeztuko dizkie umeei, gitarra elektrikoa eta eskusoinua lagun dituela. "Ikuskizunean zehar hainbat gai azaleratuko dira: ezberdina izateari beldurra, lehenengo harremanen lotsak eta 'ni naizen hori' homonormatibitatearen aurrean defendatzea, besteak beste",   azaldu dute ATX teatroko kideek. Unsainez gainera, Maryse Urruty, Jon Koldo Vazquez eta Natxo Montero antzezleak igoko dira taula gainera.

'Kaskarot' Durangaldean
Kaskarot Elorrion eta Berrizen egongo da ikusgai, otsailaren 23an eta 28an, hurrenez hurren; martxoaren 21ean Zornotzan egongo da ikusgai.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!