Landako Guneko aparkalekua 24 orduz martxan egotea “herritar askoren eskaria” dela azaldu du Aritz Bravo zinegotziak. “Lehen ez bezala, aparkalekua domeketan ere zabalik egotea ahalbidetu dugu. Asmoa da 24 orduz erabilgarri egongo den parking bat lortzea eta bide horretan pausoak ematen hastea”.
Udal gobernu taldeak aurreikusten dituen berrikuntzak teknologiari lotutakoak dira. Iker Urkiza zinegotziak azaldu duenez, “ordainketak egiteko makinak aldatu, matrikulak irakurtzeko sistema ipini” eta hesi automatikoak ipiniko dituzte aparkalekuko sarrera-irteeretan, besteak beste. Bideo-segurtasun sistema berrituko dutela ere aurreratu dute.
Erakustazoka inguruko bizilagunei begira, udal gobernu taldea balizko “bono” batzuk ezartzeko aukera aztertzen dabil, auzotarrek bertan, gauez aparkatu ahal dezaten.
Tren geltokiko aparkalekua
Landako Gunekoa ez da udal gobernu taldeak eguneratu gura duen aparkaleku bakarra . Gobernu taldeak hitzarmen bat egin gura luke, tren geltoki azpiko aparkalekuko arduradunekin. (BM-Murias aparkalekuko arduraduna ETS Euskal Trenbide Sarea da). Bravok dioenez, “erabilera gutxi” duen aparkalekua da bertakoa, eta, Landako Gunekoaren “logika beragaz”, txandakako aparkaleku zerbitzua hobetu gura dute, “prezio berdinekin”.