Durangoko udalak udal langileen postuak egonkortzeko bide berri bat hasiko du aurrerantzean. Lan Eskaintza Publiko bat prestatzeari ekingo dio, gaur egungo 16 udal-lanpostu finkatzeko. Horretaz gain, 2018ko Lan Eskaintza Publikoan (aurreko legegintzaldian) hasitako bidea ere garatuko du. Udalbatza bukatutakoan Iker Urkiza zinegotziak berripaper honi azaldu dionez, oraindik goizegi da datei buruz berba egiteko, baina urtarrilean hasiko dira LEPa diseinatzen. “Lehentasunezkoak diren lanpostuak identifikatuko ditugu lehenik. Sindikatuekin aztertuko dugu horretarako. Gero, LEParen oinarriak zeintzuk izango diren definituko dugu, azkenik, oposaketa deitzeko”. Gobernu taldearen asmoa da “hilabetean behin” oposaketetarako lan bilerak egitea, eta “hiru hilerik behin” mahai politiko eta sindikalarekin batzea.
Oposizioa, kritiko
EAJko Josune Escota zinegotziak azaldu du “beldur giroa” dela nagusi udal langileen artean. Euretako askok urte askoan egin dute lan udalean, eta oposaketa batek arriskuan ipini lezake bai haien etorkizuna eta baita udalak urte luzeetan haiei esker pilatutako esperientzia ere. “Oposaketaren moduek kezkatzen gaituzte. Langileei ez zaie informatu. Ez zaie esan nola egingo den oposaketa” azaldu du Escotak. Negoziaziorako tarterik ez ematea ere egotzi dio gobernu taldeari. Irakurketa horregaz bat egin du PSE-EEk.
Talde jeltzaleak asteon ere agertu du zenbait udal langileren geroari buruzko kezka, eta eskatu du gaiari modu “humanoan” heltzea, langileak eta hauen atzean dauden pertsonak kontuan hartuta.
“Herentzia”
Iker Urkizak azaldu du aspaldikoa dela lanpostuak arautzeko beharra, eta aurreko agintaldietan egon diren gobernu taldeei ezer ez egitea egotzi die. “Herentzia jaso dugu. Duela 10 edo 20 urtetik hona bete gabeko plazak daude Durangon. Eta, 2017an, esaterako, ez zen oposaketarik deitu. Lanpostu interinoen kopurua lan-taldearen %8 baino txikiagoa izan behar dela dio Europak. Durangon, %40an gaude”, azaldu du.
Herriaren Eskubidea taldeko Jorge Varelak adierazi duenez, oposaketa hauek garatzeak, aurrekontuak behar bezala definitzen laguntzea ekarriko du, “lanpostu eta diru-partida bakoitzak” finkatuta.