Abenduaren 6an, Joseba Jaka euskaltzale eta korrikalaria oroituko duen herri lasterketa egingo dute Durangon

Maialen Zuazubiskar 2019ko abe. 3a, 16:00
Deskargatu Info Ahotsak :

Durangon egingo den Joseba Jaka herri lasterketak adin askotariko korrikalariak batuko ditu, hamazazpigarrenez. Abenduaren 6an izango da euskaltzale eta kirolzalearen oroimenezko XVII. herri lasterketa. Nagusien lasterketa 11:30ean hasiko da. Sei kilometro izango ditu eta hiru sailkapen egongo dira: 2001etik 2004ra bitartean jaiotakoak, seniorrak eta beteranoak (40 urtetik gorakoak). Antolatzaileek jakitera eman dutenez, izen-ematea aurretik egiteko aukera egongo da, baita egunean bertan ere. Aurretik egin gura dutenek kirolprobak.com webgunean egin beharko dute. Bestalde, egunean bertan, 10:00etatik 11:15era bitartean egin ahal izango da, Ezkurdin.

Gazteen lasterketa
Aurretik umeek parte hartuko dute. Lehenengoak 2010ean edo aurretik jaiotakoak izango dira, 11:00etan; 2008tik 2009ra bitartean jaiotakoak, 11:10ean. Lasterketa bi hauetan parte hartzen duten umeek 500 metro egingo dituzte. Ondoren, infantilen  txanda izango da. 2005tik 2007ra bitartean jaiotakoak 11:20an irtengo dira. 800 metroko lasterketa egingo dute. Proba hasi baino ordu erdi lehenago egin beharko dute izen-ematea.

Umeen lasterketako izen-emateari dagokionez, parte-hartzaileak proba hasi baino ordu erdi lehenago apuntatu beharko dira, irteera lekuan bertan.

Korrikalarientzat informazioa
Lasterketan parte hartzen duten korrikalariek arropak uzteko eta dutxatzeko aukera izango dute. Gainera, lasterketa amaitu ondoren sari banaketa egingo dutela eta parte-hartzaileen artean opariak zozkatuko dituztela jakitera eman dute. Horrez gainera, korrikalarientzat txokolate beroa, kafea eta fruta egongo da, Ezkurdin.

Kirola Durango
ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!