Bizkai osotik etorri da jendea Durangoko Arte eta Historia Museora Daliren erakusketa ikusteko

Uztailaren 18an ateak zabaldu zituenetik, 1.200 bat lagunek bisitatu dute Durangoko Arte eta Historia museoa Salvador Dali margolariaren 70eko hamarkadako obra grafikoa biltzen duen erakusketaz gozatzeko. Kopuruagaz ez ezik, erakusketak udan izan duen harreragaz ere pozik agertu da Garazi Arrizabalaga museoko zuzendaria: "Kanpoko jende asko etorri da, turista asko, inguruetako jendeaz gainera. Bizkai osotik etorri da jendea".

Arrizabalagaren berbetan, luxua da eskualdean horrelako erakusketa bat edukitzea. "Horrelako erakusketak ikusteko, hiriburuetara jo behar izaten da", esan du. Guztira, 36 obra biltzen ditu erakusketak: Cervantesen On Kixote lanerako ilustratutako grabatuak; Gala eta maitasuna protagonista dituzten irudiak; eta inkontzienteagaz lotura duten grabatuak, besteak beste.

Erakusketa ez ezik, bisita gidatuak eta tailerrak ere egin dituzte Daliren obra dela eta. Hauek izan duten harreragaz ere gustura agertu da museoko zuzendaria, jende askok parte hartu baitu.

Manaut elkarlanean
Irailaren 19tik aurrera, Josep Manaut valentziarraren margoekin erakusketa bat egingo dute museoan. Arrizabalagaren esanetan, Manauten obrak dituztenek museoan erakutsi ditzakete. "Modu honetan, jendeak erakusketan parte hartzea gustatuko litzaidake", adierazi du. Horretarako interesa duenak museoan bertan galdetu dezake nola egin.