Nuñezen berbetan, kontzertua berezia izango da, izan ere, abestiak ezagunak izan arren, ezohiko formatu batean gozatuko ditu ikusleak. "Ez da batere ohikoa akordeoi orkestra batek abesti hauek jotzea; gehienak ezezagunak dira formatu horretan", adierazi du. Horrela, doinu ezberdinek beteko dute Jesuitetako agertokia. Besteak beste, Braveheart, 2001: A Space Odissey eta The Last of the Mohicans pelikuletako musika joko dute kontzertuan. Doinu latinoek ere eurenganatuko dute protagonismoaren zati bat. La Bamba eta Oye como va abestiak ipini ditu Nuñezek adibide lez. Emanaldia borobiltzeko, We are the World ezaguna joko dute. "Abesti honek sasoi bat markatu zuen, eta helburu on bat zuten hainbat musikari ezagun batu zituen", gaineratu du. Guztira, hamazortzi abesti eskainiko dituzte.
Ikus-entzunezko emanaldia
Akordeoiaren eta perkusioaren doinuak nahasteaz gainera, ikuskizuna aberastuko duten ikus-entzunezko proiekzioak ere egongo dira emanaldian. Endika Delgado arduratu da lan hori egiteaz. "Lan handia izan da, eta bilatu, egokitu, aldatu eta abestiak prestatu, denabatera egin behar izan dugu", azaldu du Nuñezek.