Hauteskundeak

Durangoko Eguzkitza auzoan ekimen industrial berriak sortu gura ditu EAJk

Markel Onaindia 2019ko mai. 23a, 16:49

Mireia Elkoroiribe alkategaiak Arantxa tapia sailburua hartu du Durangon, ekimen ekonomiko eta industrialei buruzko ideiak aurkezteko.

Batetik, Eguzkitza auzoan dagoen Eguzkitza III lursail industrialean ekimen industrial berriak sortzeko asmoa azaldu dio Elkoroiribek. “Eguzkitza III lur-sailean punta-puntako ekimen industrialak garatzea nahi dugu, Durangok eta Durangaldeak enplegu industrialean aitzindari izaten jarrai dezaten, kalitatezko enpleguan aitzindari”, azaldu du jeltzaleak. 131.537 metro karratuko lursaila da aipatutakoa. Bestetik, zonalde hartan kokatzen den IK4-Azterlan zentro teknologikoa ere bisitatu dute politikariek.

"Gobernu irekia"
Bestalde, udal kudeaketari dagokionez, Elkoroiribek esan du "gobernu irekia" osatu gura duela. Legealdiko lehen sei hileetan Gobernu Plana osatuko luke, eta gero herritarrei zuzenean azaldu. Euskadiko Gobernu Irekiko Aliantzako ordezkariei eman die bere egitasmoen berri.

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!