Azken ikerketa soziolinguistikoaren arabera, Durangon %48,9 dira euskaldunak, eta %26,8 ia euskaldunak. Baina, datu horiek ez dira erabileran islatzen. Izan ere, %22,7koa da euskararen erabilera. Horregatik, "euskararen erronka erabileran" dagoela uste du Elkoroiribek.
Jeltzaleen alkategaiak ideia horien berri eman dio Bingen Zupiria sailburuari. Biek batera herriko hainbat jarduera bisitatu zituzten atzo, euren babesa erakusteko. Durango-Durango klasikoaren hasieran egon ziren, Euskal Astearen aurkezpenean, eta Kulturalaren mendeurrenaz berba egin zuten Tabiran, futbol klubeko ordezkariekin.