Jesica Ruiz alkategai sozialistak azaldu duenez, "eskualdeko buru izango den Durango lortu gura dugu, bilakaera izango duena, lehenik eta behin pertsonengan pentsatuko duena, jasangarria eta berdintasunean oinarritukoa" eta guzti hori lortzeko talderik "onena" batzea lortu duela nabarmendu du. Hiru ardatz nagusitan lan egingo dutela adierazi du Ruizek: industria eta enplegua, jasangarritasuna eta gizarte ekintza.
Enplegua eta mugikortasuna
Durangon 1.247 langabe daudela gogoratu du alkategai sozialistak, "eta horien alde lan egin behar dugu". Era berean,PSE-EEk merkataritza dinamizatzeko ekintzak bultzatuko dituela adierazi du, eta mugikortasun plan bat landuko dutela, "ke gabeko eta trafiko gabeko Durango" bat lortzeko. Horrekin lotuta, "ezinbestekoa" deritzo Urki-Hegoalde errepidea amaitzea, eta, disuasio-aparkalekuak sortzea; lau proposatu dituzte: Tabiran, Larrasoloetan, Olleria kalean eta Landako etorbidea amaitzen den inguruan.
Nagusientzako akonpainamendu egitasmoa landu gura dute, Ruizek gaineratu duenez, eta, "berdintasun arloan eta genero biolentziagaz lotuta egindako lanarekin jarraituko dugu, eredu bihurtu gaituen lan horrekin". Bestalde, Merkatu Plazaren alboan dagoen kirolgunean erabilera askotariko zentro bat sortzeko proposamena landuko dutela aurreratu du . "Zentro horri Jesus Mari Pedrosa izena jartzea proposatuko dugu, memoria historikoan lanean jarraitu beharra dagoelako".
Rubalcaba gogoan
Durangoko Batzorde Exekutiboko idazkari den Fernando Castillok sozialistek aurkeztutako hautagaiaren formazioa eta gaitasunak nabarmendu ditu, eta gogoratu du alderdi sozialistak 1932. urtetik duela ordezkaritza Durangon. Bai Castillok bai Txema Oleaga Alfredo Perez Rubalcaba hartu dute gogoan, besteak beste, Espainiako Barne Ministroa izan zena, asteburuan hil den politikari sozialistak egindako lana gogoratu dute biek.
Hautagaien zerrenda
- Jesica Ruiz Perez
- Fernando Castillo Rodriguez
- Helena García Centeno
- Jóse Antonio Alonso Intriago
- Adoración Martínez López
- Juan Antonio Martín Prado
- Carmen Rodríguez Gato
- Luciano Lopez Santos
- Sheila Gonzalez Santos
- José Antonio Delgado González
- Maria Rodríguez Moya
- José Angel Orbegozo Ercilla
- Yoana Menchaca Sanchez