"Itunpeko ikastetxeen eta langileen baldintzak hobetu behar direla aldarrikatzen dugu"

"Itunpeko ikastetxeen eta langileen baldintzak hobetu behar direla aldarrikatzen dugu"

Kristau Eskolako Durangoko ikastetxeen zuzendariek prentsaurrekoa eman dute gaur,  hitzarmen kolektiboaren harira sortu den lan gatazkaren harira. Jaurlaritzak patronalagaz eta sindikatuekin elkarrizketarako mahai bat osatzea proposatu dute, "lan baldintzak eta itunaren finantzazio modulua hobetzeko". Gainera, gatazkak ikasleengan eta familiengan eragina duela jakitun, "ondorioak eguneroko hezkuntzan ahalik eta gutxienekoak" izatea eskatu dute.

Neverseko Julen Rojo, San Antonioko Oier Urigoitia, Jesuitetako Eva Rodriguez eta Maristetako Daniel Irazola zuzendariak agertu dira prentsaren aurrean. Elkarrizketaren aldeko deia egin dute, eta Eusko Jaurlaritzak "konpromisoa" hartu behar duela uste dute, "ekitatezko finantzazioa" lortzeko. "Gure ikastetxeetan jasangarritasuna eta inklusibitatea bermatzeko, eta eskaintzen ditugun zerbitzuei modu egokian erantzun ahal izateko, ekitatezko finantzazioa eta kontzertazio egokia beharrezkoak dira". Horrela, lanerako baldintzak hobetzea eskatu dute. "Itunpeko ikastetxeen eta langileen lan eta ekonomia baldintzak hobetu behar direla onartu eta aldarrikatzen dugu". Kristau Eskolaren balioak ere nabarmendu dituzte zuzendariek.

Kristau Eskolako Durangoko ikastetxe guztiak batuta, 3.000 ikasle eta 300 bat langile hartzen dituzte. Azaldu dute grebak eragin desberdina izan duela ikastetxeen arabera: Neversen langileen %65ek hiru egunetan egin dute greba,  San Antonion ez dute greba egin, Jesuitetan gaur DBHn izan da eta bihar eremu osoan, eta Maristetan %60k bat egin du grebagaz. 

Erlazionatuak

Kristau Eskolako gurasoak kalera irtengo dira Durangon, grebaren aurrean konponbide bat eskatzeko

Durango

Kristau Eskolako irakasleak 8 eguneko greba garatzen dabiltza, eta ikasleen gurasoak kezkatuta daude egoeragatik. Elkarretaratzera deitu dute ...