Organikoaren bilketari ekiteko, lehenik informazio kanpaina bat egingo dute udaletik. Izena ematen dutenen artean, edukiontziak zabaltzeko giltza eta etxerako kubo bat banatuko dituzte. Hondakin horiek jasotzeko, kamioi berri bi erosiko dituzte. Proiektu honen eta hondakinen bilketa zerbitzuan emango dituzten hobekuntzen bidez, biriziklapen tasa %60ra ailegatzea gura dute 2020rako. Aipagarria da lurpeko kontainerrak kendu ahalko dituztela, eta edukiontzientzako zortzi gune gehiago egongo direla herrian.
Bestalde, kale garbiketari dagokionez zonifikazioan aldaketak eman dituzte. Erdiguneko eremua Ibaizabal eta Madalena inguruetara luzatu dute, adibidez. Gune horretan egunero garbituko dituzte kaleak, arratsaldean errepasoa emanda gainera. Erdigunetik gertu dauden zonaldeetan ere asteko zazpi egunetan irtengo dira garbitzaileak, eta Aramotz eta San Fausto lako kapoaldeko auzoetan asteko bost egunetan.
Oposizioa, abstentziora
Goiztidi Diazek (EAJ) azaldu du lurpeko kontainerrak kentzeko aukera egongo dela, baina hori erabiltzaileekin aztertuko dela. Hain zuzen, Pilar Riosek (PSE-EE) gogoratu du iaz 3.000 inkesta egin zituztela etxeetan, iritzia jakiteko. Fran Garate ados dago kontratuagaz, "behar dena bete" egingo duelako.
EH Bildu eta Herriaren Eskubidea abstenitu egin dira bozketan. Dani Maezturen (EH Bildu) ustez, kontratua langileekin adosteko "aukera on bat galdu" da. Ohartarazi du gune eta zerbitzu eskainiko direla, baina langile gehiagoren kontrataziorik ez dela aurreikusten. Auzo elkarteei ere ez zaiela galdetu kritikatu du. Jorge Varelaren (Herriaren Eskubidea) iritziz ere, "arazoak" sortu ahalko dira etorkizunean langile berekin lan gehiago aurreikusi delako. "Oraindik eta gehiago aurreikusitako 3.000 etxeak egiten badira azkenean".