Jesica Ruizen hautagaitza jendaurrean aurkeztu du PSE-EEk, Durangoko alkatetzarako

Ahaldun nagusi izateko hautagai Teresa Laespadagaz batera aurkeztu da Ruiz, Durangoko Elkartegian eginiko ekitaldian, 50 bat lagunen aurrean. Maiatzaren 26an izango dira udal eta foru hauteskundeak, eta Ruizenagaz Durangoko alkatetzarako zerrendaburu bi dira publiko jadanik, Mireia Elkoroiriberen EAJkoari gehituta.

Sozialisten proiektura batzeko deia egin die Ruizek durangarrei. "Aldaketa garaia da. Gobernatzen dakien ezkerraren garaia da", esan du. Hala ere, azken lau urteetan bere alderdiak udaleko gobernu taldean eginiko lana balioan ipini du. Genero ikuspegiko politiketan "erreferentzia" izatea eta langabezia tasa hiru urtean hiru puntu bajatzea ipini ditu adibide lez. Aurrera begira, Ruizek esan du herriko auzoak eraberritzea izango dela euren apustuetako bat, eta gazteentzat alokairua sustatuko dutela ere bai, besteak beste.

Teresa Laespadaren esanetan, Eusko Jaurlaritzan dituzten karguek erakusten dute PSE-EE gai dela gobernatzeko. "Zatitzen duen abertzaletasunaren aurrean, ezker zentzuduna gara", esan du alderdiko berdintasun, gizarte mugimendu eta aniztasunaren idazkari ere badenak.  Espainiako gobernu sozialista ere goraipatu du Laespadak. "Sei hile dira Rajoyk gobernatzeari utzi zionetik, eta Espainiako politikak bira itzela eman du. Gauzak posible dira, ahalegina jartzen badugu". 

Erlazionatuak

Jesica Ruizek Pilar Rios ordezkatuko du Durangoko PSE-EEren alkategai postuan

Durango

Durangoko PSE-EEk jakitera eman duenez, alderdiak badu dagoeneko 2019ko udal hauteskundeetarako zerrendaburua. Asteburu honetan zehar garatu dute p...