Jimenezentzat erronka berria da. 16 urteko juniorrak lehenengoz parte hartuko du munduko txapelketa batean. Diazek hirugarren aldia izango du eta master kategorian ariko da. Bere posturik onena 2016an lortu zuen, 100 metroko sorosle proban laugarren amaitu zuenean.
Batek zein besteak hainbat modalitatetan parte hartuko dute, igerilekuan zein hondartzan. Igerilekuan oztopodun 200 metroetan eta 100 metroko sorosle proban lehiatuko dira, besteak beste. Hondartzan igeri-surf, taula, sky eta oceanman edo oceanwoman modalitateetan ibiliko dira. “Azken urte bietan gogor entrenatzen dihardugu hondartzetan, batez ere, Plentzian eta Lagan. Taula eta sky modalitateetan sailkatzea eta azken txandetan puntuatzeko aukera izatea espero dugu”, adierazi du Diazek.