anboto.org

50 modelo Andra Mariko pasarelara igoko dira barikuko Fashion Gauean

  Gizartea  Durango

Andra Mariko elizpea pasarela bilakatuko da Dendak Bai elkarteak antolatzen duen Fashion Gauean, barikuan, 20:30ean. 22 komertziok udazken-negu denboraldiko arropa, oinetako eta osagarriak erakutsiko dituzte. Adin guztietako 50 modelo igoko dira pasarelara. "Desfileagaz Durangok duen eskaintza komertziala erakustea gura dugu", dio Agurne Azkarate Dendak Bai elkarteko kideak. 

Antolatzaileek prentsaurrekoan azaldu dutenez, neurriko handiko arropak ere izango dira desfilean. Gainera, gozokiak, pastelak eta aseguruak ere izango dira. 

Ekitaldia L'Atelier dantza eskolako erakustaldiagaz hasiko dute. Ondoren, desfilerako aukeratutako 50 modeloak oholtza gainera igoko dira. Urriaren 6an SF 40 agentziak Fashion Gauerako modeloak aukeratzeko castinga egin zuen Durangon. Hautaketaren helburua adin guztietako herritarren parte-hartzea bultzatzea izan zen. Hartara, desfilean 15 modelo profesionalek eta 35 hasiberrik parte hartuko dute.  "Castinga oso arrakastatsua izan zen", azaldu dute Dendak Bai elkarteko kideek. 

Irati Rey Dendak Bai elkarteko ordezkariak gaineratu duenez, deskontu txarteletan gastatzeko 500 euro banatuko dituzte. Txartel horiek eskuratzeko paperak elkartearen bulegoan (Askatasun Etorbidea, 2) edo desfilearen egunean jarriko den kutxan entregatu beharko dira. 

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa