Poliziak Durangon ipinitako karpagatik azalpenak eskatu ditu EH Bilduk

Poliziak Durangon ipinitako karpagatik azalpenak eskatu ditu EH Bilduk

Alderdiaren arabera "oso larria" da atzo Ezkurdin jazotakoa. Poliziak stand bat ipini zuen Vueltako babesleen artean, eta armak erakusten eta zelan erabiltzen diren azaltzen egon zen, baita umeei ere. EH Bilduk prentsaurrekoa eman du Bilbon, eta iragarri du azalpenak eskatuko dizkiela idatziz Durangoko Udalari eta Bizkaiko Foru Aldundiari. 

"Euskal gizarteari hemen nork agintzen duen eta nork daukan indarra argi erakustea izan zen Polizia Nazionalaren karparen helburua", EH Bilduko kideen ustez. Onintze Oleaga batzarkideak eta Dani Maeztu eta Aritz Bravo zinegotziek egin dute agerraldia. Gertakaria "larria" dela diote. "Oso larria eta onargaitza, bakearen eta elkarbizitzaren alde apostu egiten duen euskal gizartearentzako". Aldundiak antolatzaileei "joko-arauak" ezarri beharko lizkiekela uste dute, eta Durangoko gobernu taldeak (EAJ eta PSE-EE) ere ardura duela. "Oraindik ezin dugu ulertu udalak nola eman zion baimena Polizia Nazionalari, besteak beste adin txikikoei ere zuzentzen zitzaienean erakustaldi hura, armak beren eskuetan jarriz".

Horrez gainera, Madrilgo Kongresuan eta Senatuan ere azalpenak eskatuko ditu EH Bilduk, herritarren aurrean espazio publiko batean armak ateratzea onartzeagatik.

Erlazionatuak

Polizia Nazionalak Durangon jarritako postuak eztabaida eragin du

Durango

Espainiako Vueltaren harira jarri dute postua. Armak erakutsi dituztela salatu dute EH Bilduk eta Herriaren Eskubideak sare sozialen bidez.