Durango Rugby Taldeak kirola elkartasunarekin uztartuko du aurten ere. Ikastetxeen VIII. Tag Errugbi Topaketa Rio de Oro elkartearen Gammar proiektuari laguntzeko baliatuko dute. Proiektu honekin Saharako errefuxiatuen kanpamenduetako emakumeei laguntzen die Durangoko elkarteak.
Topaketan parte hartuko duten ikastetxeekin elkarlanean, edozein mailetako umeek eta gazteek, topaketan parte hartu edo ez, euro bateko dohaintza egiteko aukera izango dute, ikastetxeetan banatuko dituzten itsulapikoen bidez. Iazko aldian 2.100 euro batu zituzten.
Topaketak Durangoko Arripausueta zelaian egingo dituzte, 10:00etatik aurrera. Eguaztenean DBH 3. eta 4. mailetakoak ariko dira; eguenean DBH 1. eta 2. mailetakoak, eta, ostiralean LH 4., 5. eta 6. mailetakoak.