“Aholkularitza eskaintzerakoan pertsona bakoitzak duen bizimodua ezagutzea ezinbestekoa da”

Jone Guenetxea 2018ko mar. 19a, 15:02
Deskargatu Info Ahotsak :

Visagismoan aditua da Estefania Uriarte (Durango, 1981). Aurpegiaren ikerketa eginda, norberari hobeto doazkion ile ebaketa eta koloreak zehazten ditu. Ezkontzarako zein eguneroko bizimodurako baliogarriak diren aholkuak ematen ditu Bilbon duen estudioan.

Ezkontzetatik kanpo ere, visagismo azterketak egiten dituzue. Zer da azterketa horretan lantzen duzuena?
Visagismo zerbitzuak aurpegiaren ikerketa egiten du, bakoitzari dagokion ile eta kolore ebaketa zehazteko. Aldi berean, aurpegiaren morfologia eta proportzioak zehazten ditu, egokienak diren betaurreko motak, makillaje koloreak, osagarriak, eta abar zehaztuz.

Irudi aldaketen programak boladan daude telebistan. Ilea arrosa jarri edo motz ebakitzea lako proposamenak egiten dituzue?
Visagismoak ez die modei eta tendentziei jarraitzen. Norberaren proportzioen araberako proposamenak egiten dira. Baina, garrantzitsuena da bezeroak ere aldaketa hori egin gura izatea. Aldaketarako aukera bat baino gehiago egoten da, eta bezeroak ere gustura sentitu behar du bere burua aldaketa hori egiten. Hori da garrantzitsuena guretzat. Telebistan ikusten dena espektakulua da, eta ondo dago, baina guk beste modu batera egiten dugu lan.

Bezeroagaz asko berba egiten duzuela esan didate.
Aholkularitza eskaintzerakoan, pertsona bakoitzak duen bizimodua ezagutzea ezinbestekoa da. Goizetan orrazkera atontzeko astirik barik ibiltzen zaren, esate baterako, datu garrantzitsua da. Izan ere, kolore edo mozketa batzuen mantenuak denbora eta lana suposatu dezake. Jakin behar dugu ile-apaindegira zenbatero joateko prest zauden, kolore batzuek sarriago behar dute-eta berritzea. Arroparen aholkularitzari dagokionez, garrantzitsua da, adibidez, non egiten duzun lan jakitea. Horrela, normalean, aldaketagaz asmatu egiten dugu.

Ezkontza egunak baditu bere prestaketak. Prozesu horretan laguntasuna gura duenak talde profesionala eta gertukoa aurkituko du Jaione Amantegi Estudioan. Estefania Uriarte estilista eta visagistak esperientzia handia du arlo honetan.

Zenbat pertsonak osatzen duzue lantaldea?
Hainbat arlotan dihardugun bost profesionalek osatzen dugu lantaldea. Aholkularitza, makillajea, ile-apainketa, argazkilaritza eta estetika. Zerbitzu globala zein bezeroaren neurrikoa eskaintzen ditugu.

Ezkontzeko arroparen aukeraketan ere aholkularitza eskaintzen duzue.
Ezkongai zein gonbidatuentzat gorputzaren azterketa egiten dugu, morfologiaren arabera ondo gelditu ahal zaien arroparen inguruan aholkatzeko. Azpimarratu gura nuke guk ez dugula saltzen dugun arropen inguruan komisiorik kobratzen. Gure helburua bezeroak gustuko duen arropa aurkitzea da, eta ez horren inguruko negozioa egitea.

Arropari dagokionez, gaur egun zer dago modan ezkongaien artean?
Ezkontzetan naturaltasuna dago modan, bai arropetan baita orrazkera eta makillajean ere. Dena dela, hau guztia ziklikoa eta aldakorra izaten da.

Ezkontzarako arropa beharrean, geroago eta jende gehiagok beste estilo bateko jantziak aukeratzen ditu. Mundu zabala izango da hori.
Bai, ohiko ezkontzako arropetatik kanpo ezkondu gura dutenek zer edo zer berezia gura izaten dute, eta ez da erraza. Baina polita da prozesu horretan parte hartzea.

Arropatik harago, makillajea eta orrazkera ere lantzen dituzue.
Lanketa horretan, guretzat oso garrantzitsua da probak egitea. Horregatik, denboragaz batzen gara, ideiak baloratzeko eta bezeroaren ezaugarrietara egokitzen diren orrazkerak ikusteko. Guk aholkatutako orrazkera egiteak ez du balio bezeroa eroso sentitzen ez bada. Beraz, emaitza on bat izateko, probei denbora eskaini behar zaie.

Anekdota asko bizi izan dituzue?
Hala gura duten kasuetan, ezkonkideei eta ingurukoei ezkontza egunean prestatzen laguntzen diegu. Urduritasun momentuak izaten dira. Gogoratzen dut, behin, Asturiasko mendi punta batean hotela hartuta zuen familia bati laguntzera joan ginela. Zazpi gonbidaturi makillatzen, orrazten eta janzten lagundu behar genien. Aurreko gauean joan ginen, eta goizean goiz gelditu ginen lehenengoagaz, 06:00etan. Denak lokartu ziren, eta 07:30era arte ez zen inor agertu. Aurreko gauean parrandan ibili ziren, eta jendea ezin esnaturik ibili ginen. Azkenean, baina, ondo irten zen dena. Arropak janzterakoan ere, jantziekin askotan gertatzen dira ezustekoak, baina trebeak gara horiek konpontzen.

Lan zaila duzue. Ez da erraza izango bezeroaren gustuetan asmatzea.
Esperientzia handia dugu lanbide honetan, eta horrek asko laguntzen du. Ez dut esango gustuetan asmatzea erraza denik, baina, gehienetan, ondo irteten da dena. Guretzat oso pozgarria da bezeroak ezkonbidaiaren ondoren eskerrak ematera datozenean. E-mail hunkigarri ugari ditut gordeta. Ezkondu diren horietako askok ondoren ere estudiora etortzen jarraitzen dute eta hartu-eman estua izaten jarraitzen dugu.

 

 

 

Gizartea Durango
ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!