Bi urteko egokitze prozesu baten ondoren dator emanaldi hau. Zortzi lagunek joko dute eskusoinua biharko kontzertuan, Antonio Nuñezen gidaritzapean. Akordeoia izan da beti Herri Maite taldearen oinarri nagusia, halere, beti izan dute bestelako musikarien parte hartzea. Biharkoan, Mikel Nuñez (pianoa), Iker Hernandez (bateria) eta Nekane Coello (zeharkako txirula) musikariek lagunduko diete.
“Baliabideak aprobetxatu”
Kontzertua Jesuitak ikastetxeako elizan egitea ez da kasualitatea taldeko zuzendariaren arabera. Izan ere, kontzertu bat prestatzerakoan kontutan hartzen zeintzuk diren tokiaren baliabideak. “Ikuskizun honek behar duenera bikain moldatzen da Jesuitak”. Bertako akustika egokia izateaz gainera, bideo irudiak eskainiko dituzte, abestiak janzteko. “Teknologia berriak hain eskura dauden garai hauetan, aprobetxatu egin behar dira”. Horrela, publikoari esperientzia indartsuago bat eskainiko diotela uste du Nuñezek. “Bati baino gehiagori kostako zaio aulkian geldi geratzea abestien erritmoarekin”.
Aurrera begira, taldea egonkortzea eta kontzertu gehiago eskaintzea da asmoa. Izan ere, 2018an 30 urte beteko dira Herri Maite jaio zenetik. “Garrantzitsuena urteak betetzen jarraitzea da, are gehiago, gurea bezalako talde batentzako”.