Emakumeen historia, hilekoa, zaintza... gai ugari jorratuko dira eskolan. Gainera, batukada feministaren saioak berrartuko dituzte. Ikastaroetako aurreinskripzioa martxan dago gaurtik hilaren 22ra arte. 355 plaza daude guztira, eta ikastaroren baten kopurua pasaz gero, zozketa egingo dute 28an. Gero, 29tik urriaren 10era artean azken izen-ematearen ordua izango da. Andragunean bertan (10:00etatik 13:00etara eta 17:00etatik 21:00etara) edo Internet bidez egin ahal da apuntatzeko eskaera.
Pilar Rios alkateordeak azaldu du Andragunean beste gela bat egokitu egin dutela, informatika ikastaroak bertan emateko. Gazteak erakartzeko erronkaren barruan kokatu du aldaketa hori. Kety Arrabal udal teknikariagaz eta Alba Gutierrez Andraguneko dinamizatzaileagaz batera eskaini du prentsaurrekoa Riosek. Gainera, ikastaroen 10 edizioetan parte hartu duten andre bi ere egon dira euren esperientziaren berri ematen. Saio askotan parte hartu izan duela esan du Maribel Navarrok. "Asko lagundu ninduten jubilazioa heldu zitzaidanean". Rebeca Diazen esanetan, "itzartze eta errekozimendu bat" izan da beretzat jabekuntza ikastaroetan parte hartzea.
