Tabirako igerilekua eta bere inguruak triatloilari txikiz beteko dira zapatuan

Mugarra Triatloi Taldeak VIII. Triatloi Txikia antolatuko du zapatuan Tabirako igerilekuan eta bere inguruetan, gaztetxoen artean zaletasuna pizteko. Inoiz baino parte-hartze handiagoa espero dute. Aurten, udalekuak egiten dituzten bitartean antolatu dute triatloia, eta han dabiltzan gaztetxoek ere parte hartuko dute ekimenean.

Haur-kategoriatik (2003an jaiotakoak) aurrebenjamin mailara (2009tik aurrerakoak) artekoek parte hartu dezakete, eta egunean bertan ere egin daiteke izen-ematea, 08:45era arte.

Lasterketak 09:00etan hasiko dira. “Ez dira distantzia luzeak izango. Gaztetxoek ondo pasatu dezatela da helburua, triatloia erdigune dela dibertitu daitezela”, adierazi du triatloi taldeko  Serafin Bereziartua Txelak.