Datu horiexek jakitera emateko, prentsaurrekoa egin dute Garazi Arrizabalaga Museoaren zuzendariak, eta Aitziber Irigoras Durangoko alkateak, gaur. Antolatutako ekintzei zein erakusketari dagokionez, bisitariek "balorazio oso positiboa" egin dutela azpimarratu du Irigoras alkateak; 9,5 puntu eman dizkiotela 10etik. Bestalde, Picasso: Durangotik Guernicara erakusketagaz Durangokoa eskualde mailako erreferentziazko kultur gunea izan dela, eta aurrerantzean bide horretatik jarraitu behar lukeela azpimarratu du Durangoko alkateak.
Erakusketari lotuta proposaturiko askotariko ekintzei eta bisita gidatuei herritarrek egindako harrera nabarmendu eta eskertu du Garazi Arrizabalaga Museoko zuzendariak. Azaldu du, 11 bisita gidatu eta familientzako 3 tailer egin dituztela, eta Durangoko 31 ikasle-taldek parte hartu dutela tailerretan.
Bisitari kopuruez haratago, Picasso: Durangotik Guernicara erakusketaren kalitateari eman dio garrantzia Garazi Arrizabalaga Museoko koordinatzaileak: "Azken hilabeetan Picasso, Miró edo Renau bezalako artisten jatorrizko obrak izan ditugu Durangon".