Aurretik galdeketak egin dituzten herrietako ordezkariek bat egin dute Durangoko ekitaldiagaz (Ispaster, Dima, Arrigorriaga, Busturialdea, Hernani eta Etxarri-Aranatz). 2014an lehenengo galdeketa Etxarri-Aranatzen egin zutela gogora ekarri du Nerea Iriarte ekitaldiaren gidariak. Manu Gomez herri horretako Gure Esku Dagoko kideak ere ekitaldian parte hartu du. Ondoren, Jordi Sanchez Kataluniako ANC-ko presidenteak hitza hartu du. Sanchez begirale legez etorri da Euskal Herrira, eta galdeketa hau "berme guztiekin" egiten ari direla azpimarratu du.
Anjel Oiarbide eta Zelai Nikolas Gure Esku Dago dinamikaren ordezkariek hurrengo erronka ekainaren 10ean Bilbon izango dela aurreratu dute. "Galdera ikur erraldoia osatuko dugu Euskadi Plazan hasi eta Plaza Eliptikoan amaituko den mosaikoan.Mobilizazio nazional honetan aurkeztuko dugu Herritarron Ituna; euskal komunitate osoari zuzendutako itun demokratikoa; erabakiaren bidean ate berriak zabaltzeko jaio den tresna".