Durangoko jaiak 2016

Marmitako onena prestatzeko osagai sekretua: asko dakien ama

Anboto 2016ko urr. 15a, 15:55

Ainhoa Ciarsolo, Rober Gallastegi eta Javier Santamariak irabazi dute aurtengo marmitako txapelketa San Fausto jaietan. Parte hartzen zuten lehenengo aldian irabazi dute. Zelan? Ainhoaren ama Txaro Derteano chef-aren errezeta erabilita.

112 taldek parte hartu dute aurtengo marmitako txapelketan. Landako Gunea bete egin da. Ainhoa Ciarsolo eta Rober Gallastegi durangarrek eta Javier Santamaria trapagarandarrak osatutakoa izan da talde irabazlea (200 euro, garaikurra eta txapelak). Parte hartzen zuten lehenengo aldia izan da. "Javierrek Tabirako jaietako marmitako txapelketan oso giro ona sortzen zela eta, San Fausto jaietakoan parte hartu beharko genukeela proposatu zuen eta horregatik parte hartu dugu". Marmitakoa onena prestatzeko "nire amaren gomendioak jarraitu ditugu, oso sukaldari ona delako; bere asesoramendua izan dugu", aitortu du. Txaro Derteano da bera. Txaroren esperientzia eta guzti ere txapelketa irabaztea sorpresa izan da: "Geuk ere ez dugu sinesten oraindik!".

Bigarren saria Eva Madrazok eta Juan Manuel Eguiak irabazi dute (150 euro) eta hirugarrena Jose Manuel Alonsok eta Iñigo Santocildes-ek (100 euro).

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!