Herrigunean zehar, hainbat ibilbide antolatzen dituzte, adin tarteka banatuta, jai-giroa herriko txoko guztietara zabalduz. Izen-ematea Santa Ana plazan egin daiteke, egunean bertan, 09:00etatik aurrera, lasterketak hasi baino ordu laurden lehenagora arte; hiru euro da nagusientzat, eta euro bat 14 urtetik beherakoentzat.
Zortzi eta hamalau urte arteko neskato-mutikoentzako duatloia izango da lehenengoa. 10:30ean hasiko da. 600 metroko saio bi egingo dituzte korrika, Alde Zaharrean. Korrikaldi bien artean, Tabirako igerilekuetaraino eramango dituen hiru kilometroko beste saio bat osatu beharko dute, bizikletan.
Ondoren, 11:00etan, zazpi urtera arteko gaztetxoentzako ibilbidea hasiko dute: 600 metro korrika (300 metroko saio bi) Alde Zaharretik, eta kilometro bat bizikletan, Pinondo, Laubideta eta Santanostetik. Umeek gurasoekin batera egin dezakete.
Azkenik, 12:00etan, 15 urtetik gorakoen duatloiari ekingo diote. Korrikako sektorea (4km-koa bata eta 2km-koa bestea) Barrenkale, Komentukale, Antso Estegiz, Kalebarria eta Goienkaletik izango da. Bizikletako 13 kilometroko ibilbideak Santikurutzeko bidera eta Abadiñoko txaletetara eramango ditu parte-hartzaileak.